नागपूर: पायी घरी चाललेल्या ६० मजुरांना पोलिसांनी अडवले!

नागपूर: छत्तीसगडकडे पायी निघालेल्या सुमारे ६० मजुरांना ओंकारनगर परिसरात पोलिसांनी अडविले. हे मजूर कुटुंबीय व लहान मुलांसह चंद्रपूर येथून तीन दिवसांपूर्वी निघाले होते. चंद्रपूरहून ते पायीच निघाले होते. मात्र, वाटेत मिळालेल्या एका ट्रकमधून ते नागपुरात पोहोचले. येथून रिंग रोडमार्गे ते छत्तीसगडकडे पायी जात होते. ड्युटी आटोपून परतत असलेले एसआरपीएफ जवान राहुल उमरे यांनी या मजुरांना अडवून विचारपूस केली. त्यांना थांबविले आणि पोलीस नियंत्रण कक्षाला माहिती दिली. ही माहिती मिळताच अजनी पोलीस तिथं पोहोचले. रात्री उशिरापर्यंत या मजुरांची सोय लावण्याची प्रक्रिया सुरू होती. वाचा: आता पैसे संपले आहेत, खायचीही सोय नाही. सरकारी विभागाकडून कुठलीही मदत नाही, आम्हाला आमच्या घरी परत जाऊ द्या, अशी विनंती हे मजूर करत होते. करोना संसर्गाच्या पार्श्वभूमीवर देशात लॉकडाऊन पुकारल्यापासून लाखो मजूर वेगवेगळ्या राज्यांत अडकून पडले आहेत. रोजगार बंद असल्यानं त्यांचे खाण्यापिण्याचे हाल होत आहेत. महाराष्ट्रासारख्या अनेक राज्यांनी त्यांची पोटापाण्याची सोय केली असली तरी त्यांना घरी जाण्याची आस लागली आहे. मात्र, गाड्या बंद असल्यानं त्यांची कोंडी झाली आहे. त्यातूनच अनेक मजूर मैलो न् मैल पायी चालत जाण्याचे धाडस करताना दिसत आहेत.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2ScvPaU