नागपूर: कुख्यात बाल्या बिनेकर हत्याकांडाने खळबळ, व्हिडिओ व्हायरल

म. टा. प्रतिनिधी, : सिग्नलवर कार थांबताच चार-पाचजण येतात काय, अन् सर्वांदेखत कारचालकाला घेरून त्याला संपवितात काय... शहरातील कायदा व सुव्यवस्था जणू वाऱ्यावर असल्याची प्रचीती देणारी थरारक घटना शनिवारी भरदुपारी वर्दळीच्या अमरावती मार्गावरील बोले पेट्रोलपंप चौकात घडली. विशेष म्हणजे, येथून गृहमंत्री अनिल देशमुख यांचे घर पुढच्याच चौकात म्हणजे हाकेच्या अंतरावर आहे. जुगारअड्डाचालक, कुख्यात बाल्या ऊर्फ किशोर बिनेकर याची धारदार शस्त्रांनी वार करून निर्घृण हत्या करण्यात आली, तेव्हा तेथे उपस्थित सारेच हादरले. दरम्यान, कुख्यात हत्याकांडाचा सीताबर्डी पोलीस आणि गुन्हे शाखेने पर्दाफाश केला आहे. या प्रकरणी चार मारेकऱ्यांना अटक केली आहे. चेतन हजारे, रजत तांबे, भरत पंडित व आसिफ लुडेरकर अशी अटकेतील मारेकऱ्यांची नावे आहेत. शनिवारी दुपारी बाल्या हा काळ्या रंगाच्या कारने जात होता. बोले पेट्रोल पंपाजवळ सिग्नल लागल्याने त्याने कार थांबविली. याचवेळी त्याच्या कारसमोर बुलेटस्वार आला. त्याच्या बाजूलाच मोपेडवर दोघेजण होते. सिग्नल सुरू होण्याच्या काही सेकंदाआधी पांढऱ्या रंगाचे शर्ट घातलेले दोन युवक कारजवळ आले. बुलेटस्वाराने बुलेट कारसमोर पाडली. त्यानंतर एकाने हातोड्याने कारची काच फोडली. हातोडा व धारदार शस्त्रांनी कारमध्येच बाल्यावर वार करायला सुरुवात केली. त्यानंतर अन्य तिघांनाही कारची काच फोडून बाल्यावर शस्त्रांनी वार केले. बाल्याल्या कारमधून बाहेर खेचले. पुन्हा त्याच्यावर धारदार शस्त्रांनी वार केले. रक्ताच्या थारोळ्यात बाल्या खाली पडला. त्याचा मृत्यू झाल्याची खात्री पटताच पाचही मारेकरी मोपेड व बुलेटने वेगवेगळ्या दिशांनी पसार झाले. दिवसावढळ्या भर चौकात खुनाचा लाइव्ह थरार बघताना नागरिकांमध्ये दहशत निर्माण झाली. नागरिक मिळेल त्या मार्गाने वाहन घेऊन पळायला लागले. घटनेची माहिती मिळताच पोलिस उपायुक्त विनीता शाहू, गुन्हेशाखेचे सहाय्यक पोलिस आयुक्त सुधीर नंदनवार, सीताबर्डी पोलिस स्टेशनचे वरिष्ठ पोलिस निरीक्षक जग्वेंद्रसिंग राजपूत यांच्यासह पोलिसांचा ताफा तेथे पोहोचला. पंचनामा करून पोलिसांनी बाल्याचा मृतदेह हॉस्पिटलकडे रवाना केला. बाल्याच्या हत्येप्रकरणी सीताबर्डी पोलिसांनी खुनाचा गुन्हा दाखल करून मोरकऱ्यांचा शोध सुरू केला आहे. बाल्याविरुद्ध जुगार प्रतिबंधक कायद्यासह १४ गुन्हे दाखल आहेत. २०१८मध्ये एक वर्षासाठी त्याला तडीपारही करण्यात आले होते. माणुसकी घाबरली, चित्रफीत व्हायरल दिवसाढवळ्या भर चौकात बाल्यावर धारदार शस्त्रांनी वार करण्यात आले. यावेळी चौकात शेकडो नागरिक होते. बाल्याला वाचविण्यासाठी कोणीही पुढे आले नाही. मारेकऱ्यांच्या हातातील शस्त्रे व बाल्याला रक्ताच्या थारोळ्यात बघून माणुसकी घाबरली. हे 'लाइव्ह' हत्याकांड बघताना नागरिकांचाही थरकाप उडाला. बाल्या हत्याकांडाची घटना सीसीटीव्हीत कैद झाली आहे. या हत्याकांडाची चित्रफितही उपराजधानीत व्हायरल झाली. घरापासूनच पाठलाग बाल्याचे लालगंज खैरीपुरा येथे सावजी भोजनालय आहे. आधी तो याच भागात राहायचा. काही महिन्यांपूर्वीच तो धमरपेठेतील फ्लॅटमध्ये राहायला आला. शनिवारी दुपारी बाल्या कारने धरमपेठमधून निघाला. मारेकरी धरमपेठपासूनच त्याच्या मागावर होते. बोले पेट्रोलपंपाजवळील सिग्नलवर बाल्याने कार थांबताच मारेकऱ्यांनी त्याचा खून केला. अत्यंत सुनियोजित पद्धतीने हा खून करण्यात आल्याचे सांगण्यात येते. जुगाराच्या पैशांचा वाद की वैमनस्य? बाल्याची हत्या जुगाराच्या पैशांतून झाल्याचा प्राथमिक अंदाज वर्तविण्यात येत आहे. याशिवाय, बाल्याचा त्याच्या नातेवाइकसोबत काही दिवसांपूर्वी वाद झाला होता. यावेळी दोघांनी एकमेकांना पाहून घेण्याची धमकी दिली होती. बाल्याचे अनेकांसोबत वैमनस्य होते. त्याचा नेमका कोणत्या कारणाने व कोणी खून केला, याचा तपास गुन्हेशाखा व सीताबर्डी पोलिस करीत आहेत. कट्टा चाललाच नाही हातोड्याने कारची काच फोडल्यानंतर मारेकऱ्याने बाल्याच्या डोळ्यांत मिरचीपूड फेकली. त्यानंतर कमरेतून देशीकट्टा काढला. देशीकट्टा बाल्याच्या दिशेने रोखला. मात्र, गोळी चालली नाही. त्यामुळे मारेकऱ्यांनी हतोडा, कुऱ्हाड व चाकूने बाल्याला संपविले. पोलिसांना कारमध्ये मिरचीपूड आढळली. जुनी कामठीत सलूनचालकाची हत्या कटिंग करण्यास थांबविल्याने तिघांनी दुकानात घुसून काठीने वार करून सलून चालकाचा खून केला. ही घटना शुक्रवारी रात्री जुनी कामठीतील नवीन खलाशी लाइन येथे घडली. सुरेश हंसराज थुले (वय ५५) असे मृतकाचे नाव आहे. पोलिसांनी खुनाचा गुन्हा दाखल करून तीन मारेकऱ्यांना अटक केली आहे. आकाश कचरू हाटे (वय ३२), रोहित ऊर्फ राजा कचरू हाटे (वय २६) आणि रोहित मुन्ना पांडे (वय २०) अशी अटकेतील मारेकऱ्यांची नावे आहेत. शुक्रवारी सायंकाळी आकाश हा सलूनमध्ये आला. दुकानात ग्राहक असल्याने वेळ लागेल, असे सुरेश आकाशला म्हणाले. आकाशने सुरेश यांच्यासोबत वाद घातला. रात्री ९ वाजताच्या सुमारास आकाश त्याचा लहान भाऊ रोहित व मित्र पांडे हे तिघे हातात काठ्या घेऊन दुकानात घुसले. तिघांनी डोक्यावर काठीने वार करून सुरेश यांची हत्या केली.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/309cdbp