shirdi darshan: शिर्डीत ऑनलाइन दर्शन हाऊसफुल्ल, 'ऑफलाइन' गर्दी!

म. टा. प्रतिनिधी, नगर: सरत्या वर्षाला निरोप देत नव्या वर्षाचे स्वागत करण्यासाठी शिर्डीत हजेरी लावण्यासाठी दरवर्षी लाखो भाविक येतात. यावर्षी करोनामुळे बंधनं असली तरीही, गर्दी वाढताना दिसत आहे. यावर्षी शिर्डीत येण्यासाठी ऑनलाइन बुकिंगची सोय करण्यात आली आहे. मात्र, १ जानेवारीपर्यंतचे बुकिंग पूर्ण क्षमतेने झाल्याने हजारो भाविकांनी थेट शिर्डीत हजेरी लावली आहे. मंदीर परिसरातून ऑफलाइन पास मिळविण्यासाठी करोनाची भीती सारून गर्दी झाल्याचे पाहायला मिळत आहे. प्रत्यक्ष दर्शन नाही मिळाले तरी चालेल, पण खूप महिन्यांनी शिर्डीत पाय ठेवून यायचे, या अपेक्षेनेही अनेक भाविकांनी हजेरी लावली आहे. दरवर्षी वर्षाखेरीस शिर्डीत गर्दी होतेच. नाताळच्या सुट्ट्यांपासून सुरू झालेली ही गर्दी नवीन वर्षाचे स्वागत करेपर्यंत राहते. शिर्डीतील व्यवसायांसाठीही हा उत्तम काळ असतो. साईबाबा संस्थांनलाही या काळात मोठ्या प्रमाणात देणगी मिळत असते. यावर्षी मात्र करोनाचे सावट आहे. मंदीर खुले झाल्यापासूनच शिर्डीत ऑनलाइन दर्शन बुकिंगची सोय करण्यात आली आहे. नियम पाळून प्रत्यक्ष दर्शन घेऊ शकणाऱ्या भाविकांचा कोटा ठरविण्यात आला आहे. त्यानुसार दरोज सुमारे बारा हजार भाविक दर्शन घेऊ शकतात. आता ही संख्या पंधरा हजार करण्यात येत आहे. ऑनलाइन बुकिंग न करता आलेल्यांसाठी म्हणून काही कोटा थेट मंदिरात आलेल्यांसाठी ठेवण्यात आलेला आहे. नातळच्या सुट्टीपर्यंत हे सुरळीत सुरू होते. मात्र, सुट्टी सुरू झाल्यानंतर भाविकांचा शिर्डीकडे ओढा वाढला आणि नियोजनावर ताण आला आहे. त्यामुळे वाढत्या गर्दीचे नियोजन करण्यासाठी प्रशासनाची धावपळ उडाली आहे. पास मिळविण्यासाठी मंदिराच्या काऊंटरवर गर्दी होत असून, तेथे करोनासंबंधी घ्यायच्या दक्षतेकडेही भाविकांचे दुर्लक्ष होत आहे. विशेष म्हणजे यातील अनेकांना प्रत्यक्ष दर्शन मिळण्याची शक्यता कमीच असल्याची जाणीव घरून निघताना होती. तरीही अनेक महिन्यानंतर किमान शिर्डीच्या भूमीत पाय ठेवून येऊ, अशा अपेक्षेने आलेल्या भाविकांचीही संख्या मोठी आहे. मोठ्या कालखंडानंतर गर्दी वाढल्याने शिर्डीतील व्यावसायिकांनाही आधार मिळाला आहे. गर्दीचे नियोजन करण्यासाठी जिल्हधिकाऱ्यांच्या उपस्थितीत बैठक घेण्यात आली होती. त्यानुसार नियोजन करण्यात आले असून अतिरिक्त बंदोबस्तही देण्यात आलेला आहे. राज्याचे पोलिस महासंचालक सुबोधकुमार जैस्वाल यांनी शनिवारी शिर्डीला भेट दिली, त्यावेळी त्यांनीही काही सूचना केल्या आहेत. नववर्षाच्या पूर्वसंध्येला शिर्डीमध्ये गर्दी होऊ नये, यासाठी ऑनलाइन दर्शन पास मिळाल्यानंतरच दर्शनाला या, असे आवाहन संस्थानने केले आहे. २९ व ३० डिसेंबरला दत्त जयंती कार्यक्रम आहे. ३१ डिसेंबरला वर्षअखेर आणि १ जानेवारीला नवीन वर्षाची सुरवात या दिवशी गर्दी वाढणार असल्याने आता दररोज १५ हजार भाविकांना प्रत्यक्ष दर्शन देण्याचे नियोजन करण्यात येत आहे. दररोज संस्थानकडून उपलब्ध करून देण्यात येणाऱ्या दर्शन पासपैकी ७० टक्के पास ऑनलाइन असून उर्वरित पास ऑफलाइन पद्धतीने शिर्डीत दर्शन पास काउंटरवर देण्यात येतात. ही क्षमताही आता सुट्टीच्या काळात अपुरी पडत असल्याने अनेकांना पास मिळत नाहीत.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2WOoIra