साऊंड सिस्टिमच्या वादातून तीन खून; सांगली पोलिसांची धडक कारवाई

म. टा. प्रतिनिधी । सांगली जिल्ह्यातील दुधोंडी येथे रविवारी (ता. १) झालेल्या तिहेरी खूनप्रकरणी पोलिसांनी आठ संशयितांना अटक केली. हल्ल्यातील अन्य संशयितांची धरपकड करण्यासाठी पोलिसांची दोन पथके रवाना झाली आहेत. दरम्यान, अण्णाभाऊ साठे जयंतीच्या कार्यक्रमात साऊंड सिस्टिम लावायची की नाही, यावरून झालेला वाद दोन गटातील राड्याला कारणीभूत ठरल्याचे समोर येत आहे. अन्य कारणांचाही शोध घेण्याचे काम पोलिसांकडून सुरू आहे. () दुधोंडी येथील वसंत नगर मध्ये अण्णाभाऊ साठे जयंती साजरी करण्यावरून शनिवारी रात्री साठे आणि मोहिते या दोन गटात वाद झाला होता. जयंतीच्या कार्यक्रमात मोठ्या आवाजाची साऊंड सिस्टिम वापरायला नको, असा आग्रह साठे गटाने धरला होता. मात्र मोहिते गटाने याला विरोध केल्याने वादाची ठिणगी पडली, असा आरोप साठे गटाने केला आहे. याबाबत शनिवारी रात्रीच साठे गटाने कुंडल पोलिस ठाण्यात तक्रार दाखल केली होती. यावरून रविवारी दुपारी दोन्ही गट आमनेसामने भिडले. धारदार शस्त्रांनी झालेल्या हल्ल्यात अरविंद आनंदा साठे (वय ४५), विकास आत्माराम मोहिते (३२) आणि सनी आत्माराम मोहिते (२८, सर्व रा. दुधोंडी, ता. पलूस) या तिघांचा मृत्यू झाला. याप्रकरणी पोलिसांनी आठ संशयितांना अटक केली आहे. प्रवीण विलास मोहिते, आदित्य विलास मोहिते, हिम्मत मधुकर मोहिते, विजय मधुकर मोहिते, किशोर प्रकाश मोहिते, वनिता विलास मोहिते, संगीता मधुकर मोहिते आणि मधुकर धोंडीराम मोहिते अशी अटकेतील संशयितांची नावे आहेत. अन्य संशयितांचीही धरपकड सुरू असल्याची माहिती पोलिसांनी दिली. दरम्यान, रात्री उशिरा दुधोंडी येथे तिन्ही मृतांवर अंत्यसंस्कार करण्यात आले. यावेळी दुधोंडीत मोठा पोलिस बंदोबस्त तैनात करण्यात आला होता. मामा-भाच्यांचा मृत्यू दोन गटातील राड्यात विकास मोहिते आणि सनी मोहिते या दोन सख्ख्या भावंडांसह त्यांचे मामा अरविंद साठे यांचा मृत्यू झाला. दोन कुटुंबातील तिघांचा मृत्यू झाल्याने मोहिते आणि साठे कुटुंबावर दु:खाचा डोंगर कोसळला आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3C8Ey2W