विरोधकांच्या हाती लागले भाजपचे पत्र, आमदाराच्या लेटर बॉम्बने एकच राजकीय खळबळ

अकोला : मंगळवारी झालेल्या मनपाच्या महासभेत आमदार गोवर्धन शर्मांच्या पत्राने सत्तारुढ भाजपची निष्क्रियता समोर आली आहे. तर आमदार शर्मा यांनी त्यांच्या पत्रात त्यांच्या निधीतून दिलेल्या रुग्णवाहिकेची देखभाल मनपा करू शकत नाही, असा दावा विरोधी पक्षनेते साजीद खान पठाण यांनी केला आहे. या पत्राने पाच वर्षापासून सत्तेतील भाजपाची पोलखोल झाली असून रुग्णवाहिका सत्तारुढ पक्षाद्वारे जपली जात नसल्याची खंत विरोधी पक्षनेते साजीद खान यांनी व्यक्त केली. भाजपचे आमदार गोवर्धन शर्मा यांनी करोना संकटात उपलब्ध करुन दिलेल्या रुग्णवाहिकेबद्दल विरोधी पक्षनेते साजीद खान पठाण यांनी त्यांचे आभार मानले. त्यांनी जपलेल्या मानवी मुल्याचे कौतुक साजीद खान पठाण यांनी केले. पण मनपाने दिलेल्या रुग्णवाहिकेची देखभाल करू शकत नसल्याचे आमदार शर्मा यांनी त्यांच्या पत्रात लिहिले असून त्यांनी पुढे पत्रात लिहिले की, ' अकोला मनपाला २० लाख रूपये खर्च करून रुग्णवाहिका दिली. परंतु वाईट अनुभव आला. ती रुग्णवाहिका कोणाच्याही कामात आली नाही. ती पडून राहिली असल्याने सत्तारुढ भाजपच्या नगरसेवकांचा तीळपापड झाला आहे. भाजपचे आमदार गोवर्धन शर्मा यांनी मूर्तिजापूर येथे ही रुग्णवाहिका देण्याचे पत्र दिले होते.' त्या पत्राच्या आधारे साजीद खान यांनी आमदार शर्मा हे आता मूर्तिजापुरात लढत आहे काय? असा प्रश्न केला असून मूर्तिजापूर येथील संस्थेला देण्यात येणार असल्याने यावरुन आमदार शर्मा यांनी लिहिलेल्या पत्राची जोरदार चर्चा होत आहे. पुढील काळात होणाऱ्या मनपा निवडणुकीत हे पत्र भाजपसाठी अडचणीचे तर विरोधकांसाठी महत्वाचे ठरणार आहे. हे पत्रच मनपा विरोधी पक्षनेते साजीद खान पठाण यांनी ऑनलाइन सभेत सर्वांना दाखवल्याने त्यांच्या पर्यंत हे पत्र कोणी दिले? अशी विचारणा आता होत आहे. भाजपच्या नेमक्या कुठल्या पदाधिकाऱ्यांनी हे पत्र विरोधकांच्या हाती दिले. याची चौकशी करण्याची मागणी पुढील काळात पक्षांतर्गत राजकारणात होण्याची दाट शक्यता आता व्यक्त केली जात आहे. पण या पत्राने पुन्हा एकदा महानगर पालिकेची निष्क्रियता समोर आली. या लेटर बॉम्बने सत्ताधारी भाजपच्या नगरसेवकांची झोप उडवली आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2WFTllu