जेवणानंतर शतपावली करणाऱ्या सख्ख्या बहिणींनी एकत्रच गमावले प्राण, काळजाचा ठोका चुकावणारी घटना

बीड : बीड जिल्ह्यातील पाटोदा तालुक्यातील अत्यंत दुर्दैवी घटना समोर आली आहे. जेवण करून शतपावली करण्यासाठी बाहेर पडलेल्या दोन सख्ख्या बहिणींचा धक्कादायक मृत्यू झाला आहे. भरधाव वेगाने आलेल्या स्कॉर्पिओने उडवल्याने दोघींचा जागीच मृत्यू झाला. या घटनेमुळे संपूर्ण परिसरात खळबळ उडाली असून पोलीस तपास सुरू असल्याची माहिती आहे. मिळालेल्या माहितीनुसार, ही घटना पाटोदा तालुक्यातील धनगर जवळ याठिकाणी घडली आहे. यामध्ये भरधाव स्कार्पिओने दोन बहिणींसोबत अजून दोघा जणांना उडवल्याची बातमी समोर येत आहे. मात्र, दोन सख्ख्या बहिणींचा या धडकेत मृत्यू झाल्याने सर्वत्र हळहळ व्यक्त केली जात आहे. यामध्ये रोहिणी महारुद्र गाडेकर वय वर्षे (२६) मोहिनी महारुद्र गाडेकर वय वर्ष (२२)असं मयत झालेल्या दोन बहिणींची नावं असून त्यात रोहिणी नर्स तर मोहिनी एका खाजगी कंपनीत कामाला होती. सुट्टीमध्ये गावी आलेल्या या दोघी बहिणींचा असा दुर्दैवी मृत्यू झाल्याने सर्वत्र हळहळ व्यक्त केली जात आहे. दोघी बहिणींना उडवणारी स्कॉर्पिओ क्रमांक एम एच १२ एम आर ९११३ नंबर असून या स्कॉर्पिओने पुढे जाऊन आणखी दोघांना चिरडल्याचं समजते. यामध्ये दोघी बहिणींचा मृतदेह बीड येथील रूग्णालयात शवविच्छेदनासाठी आणला होता. या घटनेची पोलिसांमध्ये नोंद झाल्यानंतर गाडीमालकाच्या विरोधात गुन्हा दाखल करण्यात आला आहे. मात्र, अचानक झालेल्या या घटनेने पाटोदा तालुक्यात मोठ्या प्रमाणात हळहळ व्यक्त करत आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/32mrYzQ