दूध संघाच्या निवडणुकीचा निकाल जाहीर, पाहा कोणी मारली बाजी?

औरंगाबाद : औरंगाबाद जिल्हा सहकारी दूध उत्पादक संघाच्या निवडणुकीत अपेक्षेप्रमाणे सर्वपक्षीय पॅनलची सरशी झाली. संचालकांच्या सात जागांसाठी झालेल्या निवडणुकीत संघाचे विद्यमान अध्यक्ष आ. हरिभाऊ बागडे यांच्यासह सर्वपक्षीय पॅनलचे सर्व उमेदवार विजयी झाले. औरंगाबाद तालुका मतदारसंघातून आ. बागडे यांना २७४, तर त्यांचे प्रतिस्पर्धी सुरेस पठाडे यांना ६५ मते मिळाली. कन्नड तालुका मतदारसंघातून गोकुळसिंग राजपूत (२६९) यांनी सुरेश चव्हाण, संतोष पवार (प्रत्येकी ३६ मते) यांचा पराभव केला. फुलंब्री तालुका मतदारसंघातून संदीप बोरसे (३३०), वैजापूर तालुका मतदारसंघातून कचरू डिके (२८६) हे विजयी झाले. महिला राखीव मतदारसंघातील दोन जागांवर अलका रमेश डोणगावकर (२८३) आणि शिलाबाई कोळगे (२७३) , तर भटक्या विमुक्त जाती- जमाती मतदारसंघातून पुंडलिक काजे (२५०) यांनी विजय मिळविला. बागडे हेच अध्यक्ष : सत्तार केंद्रीय राज्यमंत्री डॉ. भागवत कराड, महसूल राज्यमंत्री अब्दुल सत्तार, आ. हरिभाऊ बागडे, डॉ. कल्याण काळे यांच्या उपस्थितीत नवनिर्वाचित संचालकांचा सत्कार करण्यात आला. आ. हरिभाऊ बागडे हेच दूध संघाचे अध्यक्ष होतील, असा दावा राज्यमंत्री सत्तार यांनी केला. रोहयो मंत्री संदीपान भुमरे आणि त्यांचे समर्थक संचालक नंदलाल काळे यांची अनुपस्थिती चर्चेचा विषय ठरली होती.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3ItHdXp