'ईडी'चा घोटाळा बाहेर काढणार', आरोपबाजीची उणीदुणी सुरूच

मुंबई : 'केंद्रीय तपास यंत्रणांना तुम्ही खंडणीखोर केले आहे. ती तुमची साधने झाली आहेत. हे क्रिमिनल सिंडिकेट आहे. ते उघड केल्याशिवाय मी स्वस्थ बसणार नाही. कुणाला अंगावर यायचे असेल तर या. तुम्हाला तुमच्याच भाषेत उत्तर देऊ. तुम्हाला तोंड काळे करून जावे लागेल. आता बंद करा हे धंदे,' असा इशारा शिवसेनेचे खासदार संजय राऊत यांनी शनिवारी भाजपला दिला. येत्या आठवड्यात 'ईडी'चा सर्वात मोठा घोटाळा मी बाहेर काढणार आहे, असेही ते म्हणाले. ते एका पत्रकार परिषदेत बोलत होते. राऊत म्हणाले, 'तुम्हाला आमच्या मागे ईडी, सीबीआय, इन्कम टॅक्स काय लावायचे ते लावा. माझे स्पष्ट आव्हान आहे. आम्ही तुमच्या धमक्यांना घाबरत नाही. तुम्ही अशा कितीही धमक्या दिल्या तरी 'रिश्ते में हम आप के बाप लगते है.' सोमय्या यांचा पालघरला येऊर गावात मोठा प्रकल्प सुरू आहे. २६० कोटी रुपयांचा हा प्रकल्प आहे. किरीट सोमय्या यांची पत्नी मेधा या प्रकल्पाच्या संचालिका आहेत. या २६० कोटींच्या प्रकल्पात ईडीच्या संचालकांचे किती पैसे आहेत, असा प्रश्न राऊत यांनी या वेळी केला.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/f4ZJBNE