राज्य सरकारच्या तिजोरीत ठणठणाट; तरीही ६३ कारखान्यांना कर्जहमी, हजार कोटींचा कर्जभार

sourabh.sharma@timesgroup.com @sourabhsharmaMT मुंबई : राज्य सरकारच्या तिजोरीत ठणठणाट असतानाच सहकारी कारखाने आणि सूतगिरण्यांना कर्जासाठी हमी देणे सरकारच्य़ा अंगलट आले आहे. साखर कारखाने, सूतगिरण्या, कृषी प्रक्रिया उद्योगांनी राज्य सहकारी बँकांचे कर्ज थकविल्याने राज्य सरकारवर १०४९ कोटी रुपयांची थकबाकी भरण्याचा भार पडला आहे. राज्यातील ६३ कारखान्यांच्या चुकीच्या कर्जांना हमी दिल्यानेच अडचणीत सापडले आहे. राज्य सरकारतर्फे सहकारी संस्थांना कर्जासाठी हमी दिली जाते. त्यानुसार सन १९९३पासून अनेक संस्थांना हमी देण्यात आली. मात्र यापैकी ६३ सहकारी साखर कारखाने, सूतगिरण्यांनी त्यांना दिलेली कर्जे थकविली आहेत. याविरोधात राज्य सहकारी बँकेने सन २०११मध्ये सर्वोच्च न्यायालयात आव्हान दिले होते. त्यानंतर याप्रकरणी सर्वोच्च न्यायालयाने निवृत्त न्या. एस. जे. वाजिफदार यांच्या नेतृत्वाखाली दावा तडजोड समिती नेमली होती. या समितीने राज्य सरकारला थकहमीच्या रकमेचे चार समान हप्ते करून दिले. २२५ कोटींचे हप्ते अदा केल्यानंतर करोना परिस्थिती उद्भवली. त्यामुळे हप्ते देण्यास सरकारने असहमती दर्शवली. वेळ वाढवून देण्याची मागणी साखर आयुक्तालयाने केली होती. सन २०२१च्या पावसाळी अधिवेशनात आणि हिवाळी अधिवेशनात पूरक मागण्यांमध्ये थकहमीच्या १०० आणि ३९९ कोटींच्या रकमेची तरतूद मंजूर करून घेण्यात आली. त्यानुसार सहकार, पणन व वस्त्रोद्योग विभागाने उर्वरित ३९९ कोटी ४१ लाख रुपये राज्य सहकारी बँकेस अदा करण्याचा निर्णय नुकताच घेतला आहे. त्यामुळे या कारखान्यांच्या थकबाकीपोटी जवळपास १ हजार ४९ कोटी रुपये अदा करण्याची वेळ राज्य सरकारवर आली आहे. काँग्रेसच्या काळातील भार थकबाकीदार संस्थांनी काँग्रेसचे सरकार असतानाच ही कर्जे काढली होती. मात्र त्यांचे पैसे अदा करण्याची वेळ राज्यातील तीन पक्षांच्या आघाडी सरकारवर आली आहे. सहकारी संस्थांच्या कर्जाला थकहमीची प्रथा सरकारने अद्यापही कायम ठेवली आहे. साधारणपणे आपल्या पक्षातील नेत्यांच्या कारखान्यांना राज्य सरकार कर्जहमी देत असते. त्यामुळे याविरोधात राजकीय वाद होण्याची शक्यता वर्तविली जात आहे. आकडे काय सांगतात? ३९९ कोटी ४१ लाख रुपये राज्य सहकारी बँकेस मिळणार १ हजार ४९ कोटी रुपये कारखान्यांची थकबाकी

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/RcTWeS8