औरंगाबाद जिल्ह्यात बायो डिझेलप्रकरणी मोठी कारवाई; तब्बल ५७ लाखांचा मुद्देमाल जप्त

औरंगाबाद: जिल्ह्यातील एम.आय.डी.सी. वाळूंज भागातील सोलापुर धुळे हायवेवरील गोलवाडी नाका परिसरात बायो डिझेलची विक्री करणाऱ्या ठिकाणावर छापा मारत राज्य दक्षता पथकाने लाखो रुपयांचा बायो डिझेल साठा जप्त केला. याप्रकरणी वाळूज एमआयडीसी पोलीस ठाण्यात १० जणांविरोधात गुन्हा दाखल करण्यात आला आहे. जिल्ह्यात अनेक ठिकाणी ग्राहकांना स्वस्त दराच्या नावाखाली बनावट डिझेलची () अवैधरित्या विक्री होत असल्याची माहिती राज्यस्तरीय दक्षता पथकाला मिळाली होती. या माहितीच्या आधारे २७ फेब्रुवारीला राज्य दक्षता पथकाने सोलापूर धुळे हायवेवरील न्यु बायपास, गोलवाडी नाका परिसरातील बायोडिझेलची अवैधरित्या खरेदी, साठवणूक आणि विक्री होत असलेल्या ठिकाणी धाड टाकली. या कारवाईमध्ये २० हजार लिटर डिझेल सदृश्य पदार्थ आणि दोन ट्रक असा एकूण ५७ लाख ३० हजार किंमतीचा मुद्देमाल पोलिसांनी जप्त केला आहे. असा सुरु होता काळाबाजार सोलापूर धुळे हायवेवरील गोलवाडी नाका परिसरात हायवेपासून ५० मीटर आत असलेल्या एका शेतालगत असलेल्या फॉर्महाउसच्या समोर आलेल्या एका पत्र्याचे शेड असलेल्या खोल्यांमध्ये हा सर्व काळाबाजार सुरु होता. या ठिकाणी बायोडिझेल साठवणूक करून बाजारात ८० रुपये लिटरने विक्री केली जात असल्याची माहिती या कारवाईतून समोर आलीय. तर या ठिकाणी प्लास्टिक आणि लोखंडी टाक्या, वाहतुकीसाठी दोन ट्रक, इलेक्ट्रिकल पंप आणि साठवणूक करून ठेवलेला बायोडिझेल साठा जप्त करण्यात आला आहे. या कारवाईत कलिम कुरेशी, गुफरान बलिक खान पठाण, सय्यद नदिम, सलाम मोहम्मद चौकस, आवेज यार खान यांच्यासह एकूण १० जणांवर गुन्हा दाखल केला आहे. ही कारवाई राज्यस्तरीय दक्षता पथकाचे प्रमुख कान्हूराज बगाटे यांच्या मार्गदर्शनाखाली करण्यात आली आहे. गुटखा माफियाशी संबंध राज्य दक्षता पथकाने कारवाई केलेल्या बायोडिझेलच्या कारवाईने शहरात मोठी खळबळ उडाली आहे. तर शहरातील एका गुटख्या माफियाच्या आशीर्वादाने अवैध डिझेल विक्री सुरू होती, अशी माहिती सूत्रांनी दिली आहे. तर याबाबत इतर स्थानिक प्रशासनाला याबाबत माहिती कशी मिळाली नाही असाही प्रश्न उपस्थित होत आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/D0pgIWc