विधानसभाध्यक्ष निवड पुन्हा लांबणीवर; राज्यपालांच्या परवानगीअभावी आजचा मुहूर्त हुकला

म. टा. खास प्रतिनिधी, मुंबई: विधानसभा अध्यक्ष निवडीसाठी राज्य सरकारने निवडलेला आज, बुधवारचा मुहूर्त हुकला आहे. राज्यपाल भगतसिंग कोश्यारी यांनी या निवडीसाठी अद्याप परवानगी न दिल्याने महाराष्ट्र विकास आघाडी सरकारला विधानसभा अध्यक्ष निवडीसाठी नवा दिवस ठरवावा लागणार आहे. आता ही निवड १४ किंवा १५ मार्चला होईल, असे सांगण्यात येत आहे. काँग्रेसचे नाना पटोले यांनी विधानसभा अध्यक्षपदाचा राजीनामा दिल्यानंतर गेल्या अनेक महिन्यांपासून हे पद रिक्त आहे. मागील हिवाळी अधिवेशनात ही निवड केली जाणार होती. मात्र राज्यपालांनी परवानगी नाकारल्याने यंदाच्या अर्थसंकल्पीय अधिवेशनात विधानसभा अध्यक्षपदाच्या निवडीसाठी महाराष्ट्र विकास आघाडी सरकारने प्रयत्न सुरू केले होते. त्यासाठी राज्य सरकारतर्फे ९ मार्चचा दिवसही निश्चित करण्यात आला. राज्य सरकारच्यावतीने एका शिष्टमंडळाने राज्यपाल भगतसिंग कोश्यारी यांची भेटही घेतली होती. मात्र, त्यानंतरही हा प्रश्न निकाली न लागल्याने उपमुख्यमंत्री अजित पवार आणि सार्वजनिक बांधकाम मंत्री अशोक चव्हाण यांनी राज्यपालांची भेट घेतली. या भेटीत राज्यपालांनी या निवडणुकीसाठी आपण सकारात्मक असल्याचे स्पष्ट केले होते. मात्र, तरी अद्याप या निवडीसाठी परवानगी दिलेली नाही. महाराष्ट्र विकास आघाडी सरकारने मंगळवारी पुन्हा एकदा राज्यपालांना साकडे घालण्याचा प्रयत्न केला आहे. महसूलमंत्री बाळासाहेब थोरात आणि परिवहनमंत्री अॅड. अनिल परब यांनी मंगळवारी राज्यपालांची भेट घेतली. या भेटीत विधानसभा अध्यक्षांची निवड आवाजी मतदानाने करण्यासाठी त्यांनी परवानगी मागितल्याचे कळते. मात्र राज्यपालांनी परवानगी दिलेली नसल्याची माहिती हाती आली आहे. त्यातच आता हे प्रकरण न्यायालयातही गेले आहे. त्यामुळे हा विषय न्यायप्रविष्ट असताना राज्यपाल आवाजी मतदानासाठी परवानगी देण्याची शक्यता कमीच असल्याचे सूत्रांकडून सांगण्यात येत आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/deE6btX