ठाकरे सरकारच्या नियोजनाच्या अभावामुळेच कोळशाची टंचाई; दानवेंचं नितीन राऊतांना उत्तर

औरंगाबाद: 'राज्यात कोळशाचा तुटवडा असून, दोन दिवस पुरेल इतकाच साठा उपलब्ध असल्याचा इशारा उर्जामंत्री यांनी दिला होता. मात्र या परिस्थितीला ठाकरे सरकार जबाबदार असल्याचा पलटवार करत केंद्रीय रेल्वे राज्यमंत्री यांनी राज्य सरकारवर निशाणा साधला आहे. ठाकरे सरकारच्या नियोजनाच्या अभावामुळेच राज्यात कोळशाची टंचाई निर्माण झाल्याचं दानवे म्हणाले. औरंगाबाद येथे पत्रकार परिषदेत बोलताना दानवे म्हणाले की, "कोळश्याबाबत राज्याचा नियोजनाचा अभाव असून, ते आम्हाला आज सांगत आहे की, फक्त दोन दिवस पुरेल एवढा कोळसा शिल्लक आहे. त्यांनी यापूर्वीच नियोजन का केलं नाही? आजही त्यांनी मागणी केली तरीही आमच्याकडे कोळसा उपलब्ध आहे. कोळसा कंपनीने यापूर्वीच महाराष्ट्र सरकारला पत्र लिहले होते की, तुम्ही पुरेसा कोळसा साठवून ठेवा. पण असे असताना सुद्धा त्यांनी कोळसा स्टॉक करून ठेवला नाही, त्यामुळे ही परिस्थिती उद्भवली" पुढे बोलताना दानवे म्हणाले, केंद्रीय कोल कंपन्यांकडे मुबलक प्रमाणात कोळशाचा साठा आहे. पण त्यानंतर सुद्धा राज्य सरकारकडून एखादी गोष्ट होत नसेल किंवा पुरवली जात नसेल तेव्हा प्रत्येकवेळी केंद्र सरकारकडे बोट दाखवले जाते. कोळशाचं दररोजचं उत्पादन २.५ मिलियन टन असून, आधी हे २ मिलियन टन होते. त्यामुळे कोळशाच्या उत्पादन वाढ झाली आहे. अवकाळी पाऊस आणि कर्मचार्‍यांच्या संपामुळे सुरवातीला काही दिवस अडचणी निर्माण झाल्या होत्या. त्याच कारणामुळे त्यावेळी कोळसा कमी पडला होता, पण याचा अर्थ संच पडले नव्हते तर संच सुरूच होते. ज्यावेळी पाऊस पडतो त्यापूर्वी कोळसा कंपन्यातून वीज निर्मिती करणाऱ्या संचांनी आपलं नियोजन केले पाहिजे, असं दानवे म्हणाले. आपल्या देशात ८० टक्के कोळसा निघतो आणि २० टक्के बाहेरून आणला जाते. मात्र मागील काही दिवसात बाहेरून येणाऱ्या कोळशाच्या किमतीत मोठी भाववाढ झाल्याने बाहेरून येणारा कोळसा कमी झाला असून, त्यामुळे साहजिकच मागणी वाढली आहे. पण तरीही देशात कोळशाच्या टंचाई नाही. फक्त त्या-त्या राज्याने त्याचं नियोजन केले पाहिजे. मात्र असं असतानाही जर भारनियमन करण्याची वेळ जर येत असेल तर याला पूर्णपणे राज्य सरकार जबाबदार आहे, असा आरोपही दानवे यांनी केला.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/DCTNKcO