सावधान! रस पिताय? बर्फाचा दर्जा तपासा; एफडीएने केलं 'हे' महत्त्वाचं आवाहन

म. टा. प्रतिनिधी, पुणे: उन्हाळ्याची चाहूल लागल्याने आता सरबत, लस्सी, बर्फ गोळा, ताक, आइस्क्रीम यांसारख्या शीतपेयांना पसंती वाढली आहे. त्यासाठी बर्फाची मागणी वाढली असून, विविध प्रकारचे रस पीत असाल, तर सावधान...! रस किंवा अन्य शीतपेयांमध्ये वापरला जाणाऱ्या बर्फाचा दर्जा तपासण्याचे आवाहन करण्यात आले आहे. बर्फामध्ये निळसर खाद्यरंगाचा किमान १० पीपीएम एवढाच वापर करण्यात आला असावा, असे अन्न व औषध प्रशासनाने (एफडीए) खाद्यविक्रेत्यांना बजावले आहे. उन्हाळ्याच्या पार्श्वभूमीवर थंड पदार्थांची मागणी वाढते. त्या वेळी बर्फासारख्या पदार्थाचा वापर अधिक प्रमाणात केला जातो. भेसळयुक्त बर्फ असण्याची शक्यता असल्याने आता बर्फ किंवा शीतपेयांची तपासणी करण्यासाठी 'एफडीए'ने मोहीम सुरू केली आहे. त्या मोहिमेतंर्गत बर्फाच्या दर्जासह विविध प्रकारची तपासणी केली जाणार आहे. 'तहान भागविण्यासाठी सरबत, लस्सी, बर्फ गोळा, नीरा, ताक, ज्यूस, आइस्क्रीम, कोल्ड्रिंक्सचे सेवन केले जाते. खाण्याचा बर्फ किंवा कच्चा माल आणि तयार अन्नपदार्थाच्या दर्जाची खात्री करणे आवश्यक आहे. 'एफडीए'ने मोहीम सुरू केली आहे. राज्यात बर्फाचे उत्पादन करताना खाद्यदर्जाचा बर्फ हा पिण्यायोग्य पाण्यापासून तयार करण्यात यावा; तो रंगहीन असावा. अखाद्य बर्फात खाद्योपयोगासाठी वापरण्यात येणारा रंग 'इंडिगो कॅरमाइन' किंवा 'ब्रिलियंट ब्लू एफसीएफ' रंग अत्यल्प प्रमाणात निळसर रंगाची छटा निर्माण होईल एवढा किमान १० पीपीएम खाद्यरंग टाकावा,' असे आवाहन 'एफडीए'चे सहआयुक्त शिवाजी देसाई यांनी केले. खाद्यबर्फ विक्री व खाद्यपदार्थांत वापरण्यात येणारा बर्फ, बर्फ उत्पादक, साठा, वितरण, वाहतूक व विक्रीवेळी उल्लंघन करणाऱ्या आस्थापनांविरुद्ध 'एफडीए'कडून कारवाई घेण्यात येणार आहे. अखाद्य बर्फाच्या उत्पादकांनी त्यात खाद्यरंगाचा वापर केला नाही, तर असा बर्फ खाद्यबर्फ समजून त्याला अन्न सुरक्षा व मानके अधिनियम २००६ नियम व नियमन २०११ मधील तरतुदीनुसार कारवाई करण्यात येईल, असाही इशारा त्यांनी दिला आहे. रसवंतिगृहांसह शीतपेय विक्रेत्यांनी खाद्यबर्फ परवानाधारक किंवा नोंदणीधारक व्यावसायिकांकडून खरेदी करावा. नागरिकांनी वरील पदार्थांचे सेवन करताना विक्रेत्यांकडे खाद्यबर्फ असल्याची खात्री करावी. - शिवाजी देसाई, सहआयुक्त, 'एफडीए'

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/PE2rnqb