मुंबईत ५४ रुग्ण दगावले; दिवसभरात १५१० नव्या बाधितांची भर

मुंबई: मुंबईत आज चोवीस तासांत ५४ करोनाबाधित रुग्ण दगावले आहेत. त्यामुळे मुंबईतील करोनामुळे दगावलेल्या रुग्णांची संख्या १२२७ झाली आहे. आज मुंबईत १५१० नवे करोनाबाधित सापडल्याने मुंबईतील करोनाबाधितांची संख्या ३८ हजार २२० वर पोहोचली आहे. आज दगावलेल्या ५४ रुग्णांमध्ये १४ रुग्ण हे २५ ते २८ मे दरम्यानचे आहेत. तर आज दगावलेल्यांपैकी ३९ रुग्णांना दीर्घकालीन आजार होते. आज मुंबईत करोनामुळे ३१ पुरुष आणि २३ स्त्रीयांचा मृत्यू झाला आहे. मृतांपैकी २८ रुग्णांचं वय ६० पेक्षा अधिक असून २६ रुग्ण हे ४० ते ६० वर्षाच्या दरम्यानची आहेत. आज ३५६ रुग्ण बरे झाले असून मुंबईतील बरे होणाऱ्या रुग्णांची संख्या १६ हजार ३६४वर गेली आहे. धारावीतील एका ९० वर्षीय महिलेने करोनावर यशस्वी मात केल्याचं पालिकेनं सांगितलं. या महिलेला उच्च रक्तदाब, श्वसनविकार, ताप, खोकल्याचा त्रास होता. त्यांच्या शरीरातील ऑक्सिजनची पातळी ८४ टक्क्यांपेक्षा कमी होती. या महिलेवर तातडीने उपचार करण्यात आले. आठवड्याभरात या महिलेच्या प्रकृतीत सुधारणा झाली. त्यांची श्वसन क्रियाही सुधारली आणि त्या चालू फिरू लागल्या. त्यामुळे त्यांना घरी सोडण्यात आल्याचं पालिकेने सांगितलं. एका ५७ वर्षीय व्यक्तीलाही श्वसानाचा विकार होता. ताप आणि खोकलाही होता. तरीही त्यांनी करोनावर मात केल्याचं पालिकेने सांगितलं. आतापर्यंत अत्यवस्थ असलेल्या ३८ रुग्णांवर टोसिलीझूमॅब या औषधांनी उपचार करण्यात आला. त्यापैकी २२ रुग्णांची प्रकृती सुधारली असून ७ रुग्णांना घरी सोडण्यात आले आहे. पालिकेने दिलेल्या माहितीनुसार मुंबईच्या जी/ उत्तर विभागात कालपर्यंत २९०० रुग्ण होते. तर ई वॉर्डात २५२८, एफ/उत्तरमध्ये २५१७, एल वॉर्डात २४९५, एच पूर्वेमध्ये २२२१, के पश्चिममध्ये २२१०, के पुर्वेत २१०७ आणि जी/ उत्तरमध्ये २००८ रुग्ण सापडले आहेत.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3ciraLR