पंढरपूरकडे येणारी एसटी सेवा बंद; वंचितच्या आंदोलनाला सरकार घाबरले

सुनील दिवाण, सोलापूर: राज्यातील धार्मिकस्थळं सुरू करण्याच्या मागणीसाठी उद्या सोमवारी एक लाख भाविकांसह पंढरपूरच्या विठ्ठल मंदिरात मोर्चा काढण्याच्या वंचित बहुजन आघाडीने दिलेल्या इशाऱ्याचा राज्य सरकारने प्रचंड धसका घेतला आहे. वंचितच्या उद्या होणाऱ्या आंदोलनाच्या पार्श्वभूमीवर पंढरपूरकडे येणारी सर्व एसटी सेवा बंद करण्यात आली असून एसटी सेवा बंद करण्याचे आदेशच जिल्हाधिकाऱ्याने आज दिले आहेत. राज्यातील धार्मिकस्थळं सुरू करण्यासाठी वंचितचे नेते यांच्या नेतृत्वाखाली उद्या पंढरपुरात विठ्ठल मंदिर प्रवेशाचं आंदोलन करण्यात येणार आहे. करोनाच्या नावाखाली सरकारने विनाकारण धार्मिकस्थळं बंद ठेवल्याचा दावा करत वंचितने हे आंदोलन पुकारले आहे. त्यामुळे उद्या पंढरपुरात वारकऱ्यांनी गर्दी करू नये आणि त्यामुळे करोना संसर्गाचा फैलाव होऊ नये म्हणून प्रशासनाने जय्यत तयारी केली आहे. आज जिल्हाधिकाऱ्याने पंढरपूरमध्ये येणाऱ्या सर्व एसटी सेवा बंद करण्याचे आदेश दिले आहेत. तसेच विठ्ठल मंदिर परिसरात दहा फूट उंचीचे लोखंडी बॅरेकेटिंग लावण्यात आले आहेत. कुणीही मंदिरात प्रवेश करू नये म्हणून हे बॅरिकेटिंग लावण्यात आले आहेत. तसेच मंदिर परिसरासह संपूर्ण पंढरपुरात पोलिसांचा प्रचंड ताफा तैनात करण्यात आला आहे. पंढरपुरात करण्यात आलेल्या पोलीस बंदोबस्तावर वंचित बहुजन आघाडीने सडकून टीका केली आहे. कितीही रेलिंग किंवा बॅरिकेटिंग करा आम्ही विठ्ठल मंदिरात प्रवेश करणारच असा इशारा वंचित बहुजन आघाडीचे प्रवक्ते आनंद चंदनशिवे आणि प्रदेशाध्यक्ष अशोक सोनावणे यांनी दिला आहे. आम्ही रेलिंग तोडून मंदिरात प्रवेश करू. विठ्ठलाचा दरबार उघडला तर राज्यातील करोना पळून जाईल. त्यामुळे सरकारने मंदिरं खुले करावीत, अशी मागणीही चंदनशिवे यांनी केली आहे. सरकारने वंचितच्या आंदोलनाचा धसका घेतला आहे. हे आंदोलन दडपण्याचा प्रकार सुरू आहे. त्यासाठी पंढरपुरात रेलिंग लावण्यात आले असून एसटी सेवाही बंद करण्यात आली आहे. प्रशासनाने एसटी सेवा बंद केली तरी आम्ही पंढरपुरात घुसूच. आम्हाल कोणीही रोखू शकत नाही, असं सांगतानाच पंढरपुरातील व्यापाऱ्यांनीही आपल्या आंदोलनाला पाठिंबा दिला असून तेही या आंदोलनात सहभागी होणार असल्याचं त्यांनी सांगितलं. त्यामुळे उद्या होणाऱ्या वंचितच्या आंदोलनाकडे संपूर्ण महाराष्ट्राचं लक्ष लागलं आहे. वाचा: वाचा:

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3b78nEf