स्वप्नपूर्तीची संधी! मुंबईतील घरे ६ लाखांनी स्वस्त होणार

मुंबई : बांधकाम व्यावसायिकांना निवासी संकुल उभारणीसाठी आवश्यक असलेल्या प्रीमियम शुल्कात कपात केल्याने, आता घरे स्वस्त होण्याची आशा बळावली आहे. हा लाभ घेणाऱ्या बिल्डरांना ग्राहकांचे मुद्रांक शुल्क स्वत: भरायचे आहे. पण, निव्वळ प्रीमियम कपातीचा लाभ ग्राहकांना मिळाल्यास मुंबईसारख्या शहरात सरासरी ६ लाख रुपयांपर्यंत घरे स्वस्त होऊ शकतात. निवासी संकुलासह अन्य बांधकामांसंबंधी नानाविध परवानग्यांपोटी पालिका प्रशासनाकडून आकारल्या जाणाऱ्या शुल्काला ''म्हटले जाते. संबंधित संकुलाचा रेडी रेकनर, चटई क्षेत्र निर्देशांक, वापरयोग्य चटई क्षेत्र, एकूण प्रस्तावित बांधकाम, बांधकामाचे स्वरूप आदी माहितीच्या आधारे हे शुल्क निश्चित होते. बांधकाम व्यावसायिकांची प्रमुख संघटना असलेल्या 'नरेडको महाराष्ट्र'चे अध्यक्ष अशोक मोहनानी यांनी याबाबत सांगितले की, 'कुठल्याही निवासी संकुलाच्या बांधकामात किमान एक तृतीयांश खर्च हा प्रीमियम शुल्काचाच असतो. त्यामुळे या उच्च दराचा निवासी संकुलाच्या बांधकामावर आर्थिक बोजा येतो. त्यात कपातीमुळे बांधकामाचा खर्च कमी होईल. त्यातून घरांच्या किमती कमी होण्यास मदत होईल व अखेरीस मागणी वाढेल, असा आम्हाला विश्वास आहे.' मुंबई शहर, उपनगर किंवा महानगर क्षेत्रात मोठी संकुले अधिक आहेत. करोना काळात मोठ्या खर्चामुळे अशा अनेक संकुलांचे बांधकाम ठप्प झाले. ते आता पुन्हा सुरू होईल. साधारण ३,५०० ते ५,००० फ्लॅट्सच्या बृहन्मुंबई महापालिका क्षेत्रातील अशा मोठ्या निवासी संकुलांचे प्रीमियम शुल्क साधारण ५०० कोटी रुपयांपर्यंत असते. प्रतिफ्लॅट हा खर्च १२.५० लाख रुपयांच्या घरात येतो. आता यांत ५० टक्के सवलतीचा विचार केल्यास, किंवा बिल्डरांचा प्रतिफ्लॅट हा खर्च थेट ६.२५ लाख रुपयांवर येणार आहे. किमान तेवढ्या घरांच्या किमती कमी होण्याची अपेक्षा आहे. 'यामुळेच हा रिअल इस्टेट क्षेत्राला चालना देण्यासाठीचा महत्त्वपूर्ण निर्णय आहे. या क्षेत्रात आगामी काळात घरांच्या व्यवहार्य किमतींमुळे वेग येईल', असा विश्वास सनटेक रिअॅलिटीचे अध्यक्ष कमल खेतान यांनी केला आहे. डिसेंबरअखेर दमदार विक्री झाली, तरी सर्वाधिक रोजगार असलेल्या रिअल इस्टेट क्षेत्राला तातडीने मोठा बूस्ट मिळण्याची गरज होती. धोरणात्मक सुधारणांची गरज होती. अशावेळी हा निर्णय या क्षेत्रात अतिरिक्त तरलता आणेल. ही कपात थांबलेल्या प्रकल्पांना त्वरित पुढचा गिअर टाकण्यात मोठ्या प्रमाणात मदतशीर ठरेल. - डॉ. निरंजन हिरानंदानी, अध्यक्ष, नरेडको नॅशनल

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/2LwN1Ho