'नशा दौलत का ऐसा भी क्या...'; दारूबंदीवरून रुपाली चाकणकरांचा फडणवीसांना गंभीर टोला

पुणे : चंद्रपूर जिल्ह्यामधील दारुबंदी उठवल्यामुळे विरोधी पक्षाने ठाकरे सरकारवर टीकेची झोड उठवली आहे. अशात राष्ट्रवादी काँग्रेसच्या महिला आघाडीच्या अध्यक्ष रुपाली चाकणकर ()यांनी विरोधी पक्षनेते देवेंद्र फडणवीस यांच्यावर त्यांच्या शैलीत घणाघाती टीका केली आहे. याबद्दल त्यांनी एक ट्वीट करत फडणवीसांचा जुना व्हिडिओदेखील त्यांनी शेअर केला आहे. चंद्रपूरमधील दारूबंदी उठवणं हे अतिशय दुर्दैवी असल्याचं देवेंद्र फडणवीस यांनी म्हटलं होतं. यावर दारूबंदी हा तर बहाणा आहे. चंद्रपुरात दारूबंदी होती तेव्हा मोठ्या प्रमाणात अवैध दारूविक्री सुरू होती. त्यामुळे यांना मालपाणी मिळत होतं. पण दारूबंदीचा निर्णय उठवल्यामुळे त्यांचं मालपाणी बंद होईल, अशा शब्दात रुपाली चाकणकर यांनी फडणवीसांवर टीका केली आहे. रुपाली यांनी ट्वीट करताना लिहलं की, 'दारूबंदी तो बहाणा है, "मालपाणी" निशाना है, नशा दौलत का ऐसा भी क्या, के तुझे कुछ भी याद नहीं, क्या हुआ तेरा'. रुपाली चाकणकर यांच्या या ट्वीटमध्ये राजकीय वातावरण तापलं आहे. त्यामुळे यावर आता विरोधी पक्षनेते देवेंद्र फडणवीस काय उत्तर देतात हे पाहणं महत्त्वाचं आहे. दरम्यान, राज्य मंत्रिमंडळाने चंद्रपुरातील दारूबंदी उठवण्याचा निर्णय घेतला असून करोना काळात राज्यातील आरोग्याच्या स्थितीवर लक्ष देणे सोडून महाविकास आघाडी सरकारच्या प्राथमिकता काय आहेत, हेच या निर्णयातून दिसून येते. त्यामुळेच हा निर्णय अतिशय दुर्दैवी आहे, असेही देवेंद्र फडणवीस यांनी म्हटलं होतं.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/34zHTIM