या ६३ वर्षीय निवृत्त अधिकाऱ्याला जेलमध्ये जावं लागणार; १५ वर्षांपूर्वी केलेलं कृत्य भोवलं!

सांगली : विविध कार्यकारी सोसायटीच्या सचिव पदावर काम करताना भ्रष्ट मार्गाने मिळवलेली संपत्ती सचिवाला सेवानिवृत्तीनंतर कारागृहात घेऊन गेली आहे. पगारापेक्षा दुप्पट अपसंपदा मिळवल्याच्या गुन्ह्यात अरविंद बाबुराव देशपांडे (वय ६३, रा. दिघंची, ता. आटपाडी) यांना कोर्टाने लाचलुचपत प्रतिबंधक कायद्यांतर्गत दोन वर्षे सक्तमजुरी, तसंच ५० हजार रुपये दंडाची शिक्षा सुनावली. लाचखोरीची तक्रार झाल्यानंतर १५ वर्षांनी या प्रकरणाचा निर्णय आला आहे. अरविंद देशपांडे हे आटपाडी तालुक्यातील दिघंची विविध कार्यकारी सोसायटीत १९८७ ते २००७ या कालावधीत सचिव पदावर कार्यरत होते. त्या काळात देशपांडे यांनी पगारापेक्षा दुप्पट अपसंपदा मिळवल्याची तक्रार लाचलुचपत प्रतिबंधक विभागाकडे दाखल झाली होती. अॅड. महेंद्र शेटे यांच्या तक्रारीनुसार देशपांडे यांची चौकशी सुरू झाली होती. २० वर्षांच्या कालावधीत म्हणजेच १९८७ ते ३० जून २००६ पर्यंत देशपांडे यांनी १३ लाख १६ हजार ३७४ रुपयांची जास्त संपत्ती जमा केल्याचं तपासात स्पष्ट झालं. ही अपसंपदा त्यांच्या एकूण उत्पन्नाच्या ४०.९३ टक्के इतकी होती. या मालमत्तेबाबत खुलासा सादर करण्यासाठी पुरेशी संधी देऊनही ते समाधानकारक खुलासा करु शकले नाहीत. तसंच मालमत्ता धारण करतेवेळी त्यांनी आपल्या वरिष्ठांची परवानगी घेतली नसल्याचं तपासात समोर आलं. याबाबत विशेष न्यायालयाचे अतिरिक्त जिल्हा व सत्र न्यायाधीश एस. पी. पोळ यांनी आरोपीस दोषी धरुन लाचलुचपत प्रतिबंधक कायद्यातील तरतुदींनुसार दोन वर्षे सक्तमुजुरीची व ५० हजार रुपयांची शिक्षा सुनावली. दरम्यान, या प्रकरणात सरकार पक्षातर्फे अतिरिक्त जिल्हा सरकारी वकील अनिल एन. कुलकर्णी यांनी काम पाहिले.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3ASYTIU