अण्णा हजारेंच्या आंदोलनात लवकरच नवी टीम, ‘यांची’ लागणार वर्णी

विजयसिंह होलम । बराच काळ प्रत्यक्ष आंदोलनांपासून दूर राहिल्यानंतर ज्येष्ठ समाजसेवक () यांच्या या संघटनेची फेरबांधणी करण्यात येत आहे. काही जुन्या कार्यकर्त्यांना नारळ देऊन नव्यांचा समावेश केला जाण्याची शक्यता आहे. त्यासाठी राज्यभर तालुका ते जिल्हास्तरापर्यंत कार्यकर्त्यांच्या निवडीसाठी बैठका बोलाविण्यात आल्या आहेत. नगर जिल्ह्याची बैठक मंगळवारी, ३० नोव्हेंबर रोजी होणार आहे. संघटनेच्या निकषात बसणाऱ्या आणि बैठकीला उपस्थित राहणाऱ्या कार्यकर्त्यांचीच यासाठी निवड करण्यात येणार असल्याचे सांगण्यात आले. करोना आणि इतर कारणांमुळे हजारे यांची विविध मुद्द्यांवरील प्रत्यक्ष आंदोलने थांबली आहेत. त्यामुळे मधल्या काळात त्यांच्या संघटनेतही मरगळ आली होती. काही कार्यकर्ते दुरावले होते. शाखा कार्यकारिणी बरखास्त करण्यात आल्या होत्या. नवीन नियुक्त्या रखडल्या होत्या. काही दिवसांपूर्वी हजारे यांनी पुन्हा एकदा तालुका ते देशपातळीपर्यंत संघटना मजबूत करण्याची घोषणा केली होती. त्यानुसार आता काम सुरू झाले आहे. भ्रष्टाचार विरोधी जन आंदोलन न्यास या संघटनेची फेरबांधणी करण्यात येणार आहे. नगर जिल्ह्याची बैठक ३० नोव्हेंबरला होणार असल्याची माहिती जिल्हा संघटक सुधीर भद्रे यांनी दिली. मंगळवारी सकाळी साडेअकरा वाजता संघटनेचे प्रदेश सरचिटणीस अशोक सब्बन यांच्या उपस्थितीत मार्केट यार्डमधील किसान क्रांती बिल्डिंगमधील सभागृहात ही बैठक होणार आहे. यामध्ये संघटनेची पुर्नरबांधणी करून जिल्हा, तालुका व शहर कार्यकारणीची निवड करण्यात येणार आहे. ती नावे मान्यतेसाठी केंद्रीय कार्ययालयाकडे पाठवण्यात येणार आहे. जिल्ह्यातील कार्यकर्त्यांनी तसेच नव्याने सहभागी होऊ इच्छिणाऱ्या सर्व कार्यकर्त्यांनी यावेळी उपस्थित राहावे, असे आवाहन करण्यात आले आहे. जिल्ह्यातील सर्व प्रामाणिक, चारित्रसंपन्न, त्यागी, निस्पृह, सामाजिक बांधिलकीची जाणीव असलेल्या व समाज कार्यासाठी वेळ देऊ इच्छिणाऱ्या कार्यकर्त्यांनीच या बैठकीला उपस्थित राहावे. जिल्हा, शहर व तालुक्यातील कार्यकारणीवर काम करण्यास इच्छुक असणार्‍या सर्वांनी उपस्थित राहणे बंधनकारक आहे, असे अशोक सब्बन यांनी सांगितले. हेही वाचा:

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3I0skfS