'निवडणुकीसाठी बायको पाहिजे' बॅनर पाटलांना महागात पडला, कारण महापालिकेने....

औरंगाबाद : सकाळपासून सोशल मीडियावर धुमाकूळ घालणारा आणि औरंगाबाद शहरात चर्चेत आलेला, 'उमेदवार बायको पाहिजे' असा बॅनर लावणारे आता अडचणीत सापडले आहेत. त्यांनी लावलेलं बॅनर आज दुपारी भाजपने फाडले आणि आता मनपाने विनापरवानगी बॅनर लावल्याप्रकरणी पोलिसात गुन्हा दाखल केला. त्यामुळे ८ बाय १० चं बॅनर पाटलांना चांगलंच महागात पडलं. औरंगाबादच्या रमेश पाटील नावाच्या ३५ वर्षे व्यक्तीने औरंगाबाद शहरातील गुलमंडी भागात एक बॅनर लावला होता. ज्यावर, मला तीन मुले असल्याने मी निवडणूक लढवू शकत नाही. त्यामुळे मला निवडणूक लढवण्यासाठी उमेदवार बायको पाहिजे आहे,असा उल्लेख बॅनरवर करण्यात आला होता. त्यामुळे या बॅनरची शहरात जोरदार चर्चा सुरु होती, तसेच सोशल मीडियावर सुद्धा या बॅनरचे फोटो व्हायरल होत होते. मात्र दुपारी भाजप महिला आघाडीने हे महिलांचा अपमान असल्याचा आरोप करत बॅनर फाडले होते. त्यातच आता औरंगाबाद महानगरपालिकेचे स्वच्छता निरीक्षक विकास मोहाडी यांनी क्रांती चौक पोलीस ठाण्यात दिलेल्या तक्रारीनुसार, बॅनर लावणारे रमेश विनायकराव पाटील यांनी अनधिकृतपणे महानगरपालिका कार्यालयाची परवानगी न घेता सार्वजनिक रोडवर चौकात बॅनर लावून औरंगाबाद शहराचे विद्रुपीकरण केले म्हणुन, महाराष्ट्र मालमत्ता विरुपन कायदा अधिनियम 1995 कलम 3 प्रमाणे गुन्हा दाखल केला आहे. त्यामुळे पाटील यांच्या अडचणीत वाढ झाली आहे. पाटलांची हवा.... औरंगाबाद मधील रमेश पाटील यांचं हे बॅनर सोशल मीडियावर मोठ्या प्रमाणात व्हायरल होत आहे. फेसबुक, इन्स्टाग्रामवरील अनेक व्हायरल पेजवर या फोटोला शेअर केले जात आहे. तर यावर कमेंट करणाऱ्यांची संख्या सुध्दा मोठ्या प्रमाणात आहे. त्यामुळे सकाळपासून पाटलांची हवा पाहायला मिळत आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3jzQpfNEn