बनावट खादीउत्पादनांची विक्री; दक्षिण मुंबईतील ७० वर्ष जुने 'खादी एम्पोरियम'ला टाळे

म. टा. खास प्रतिनिधी, मुंबईः दक्षिण मुंबईतील डॉ. डी.एन. मार्गावरील खादी एम्पोरियमला टाळे लागले आहे. बनावट खादीउत्पादनांची विक्री होत असल्याने केंद्र सरकारच्या खादी व ग्रामोद्योग आयोगाने (केव्हीआयसी) ही कारवाई केली. डॉ. डी.एन. मार्गावर १९५४पासून मेट्रोपॉलिटन इन्शुरन्स हाऊस येथे 'खादी एम्पोरियम' हे शोरूम आहे. यामध्ये खादी नसलेल्या उत्पादनांची विक्री होत असल्याची माहिती आयोगाला मिळाली होती. नियमित तपासणीदरम्यान अधिकाऱ्यांनी एम्पोरियममधून नमुने गोळा केले. त्यावेळी खादी नसलेले पदार्थ असल्याचे आढळून आले. आयोगाने जारी केलेल्या 'खादी प्रमाणपत्र' आणि 'खादी गुण प्रमाणपत्र'च्या नियमांचे उल्लंघन केल्याबद्दल शोरूमला कायदेशीर नोटीस जारी केली. नोंदणी रद्द केल्यामुळे आता खादी एम्पोरियमचे अस्सल खादी आऊटलेट राहिलेले नाही आणि यापुढे एम्पोरियममधून खादी उत्पादने विकण्याची परवानगी नाही, असे आयोगाने म्हटले आहे. याखेरीज विश्वासार्हतेचा भंग केल्याबद्दल आणि खादी ब्रँडची विश्वासार्हता तसेच लोकप्रियता यांचा गैरवापर करून नागरिकांची फसवणूक केल्याबद्दल आयोग खादी एम्पोरियमविरुद्ध कायदेशीर कारवाईचाही विचार करत आहे. आय़ोागाने मागील काही वर्षांमध्ये 'खादी इंडिया'चा गैरवापर आणि ट्रेडमार्कच्या उल्लंघनाविरुद्ध कठोर कारवाई केली आहे. त्यानुसार आत्तापर्यंत १,२००हून अधिक व्यक्ती आणि कंपन्यांना 'खादी' या ब्रँड नावाचा गैरवापर केल्याबद्दल आणि 'खादी' या नावाने बिगर खादी उत्पादने विकल्याबद्दल कायदेशीर नोटीस बजावल्या आहेत. त्यामध्ये फॅब इंडियाचादेखील समावेश आहे. आयोगाने फॅब इंडियाकडून ५०० कोटींच्या नुकसानीची मागणी केली असून, ते प्रकरण मुंबई उच्च न्यायालयात प्रलंबित आहे. गेल्या वर्षी ऑनलाइन शॉपिंग पोर्टल्सना खादी नसलेल्या १४० वेब लिंकदेखील काढून टाकण्यास बाध्य केले आहे, असे आयोगाने स्पष्ट केले आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/WE8GKwi