धक्कादायक! जेवण व्यवस्थित देत नाही, लग्नही लावून देत नाहीत, पोराने बापाला जागेवर मारलं!

औरंगाबाद : औरंगाबाद जिल्ह्यातील वाळूज पोलीस ठाणे अंतर्गत धक्कादायक घटना उघडकीस आली आहे. वडील लग्न लावून देत नाही आणि जेवायलाही व्यवस्थित देत नाही, या शुल्लक कारणावरुन मुलानेच वडिलांच्या छातीवर, पोटावर तसंच गुप्तांगावर लाथा मारून बापाची हत्या केल्याचं समोर आलं आहे. ही घटना दहेगाव बंगला भागात घडली आहे. अनिल कडूबाळ सोनवणे (वय २२) असं आरोपी मुलाचे नाव असून, कडूबाळ मुरलीधर सोनवणे (वय ५५) असं मृत्य बापाचं नाव आहे. पोलिसांनी दिलेल्या माहितीनुसार, मृत्य व्यक्ती कडूबाळ यांची पत्नी अलका सोनवणे यांनी दहा ते बारा वर्षांपूर्वी जाळून घेऊन आत्महत्या केली आहे. तेव्हापासून कडूबाळ हे मोठा मुलगा सुनिल आणि लहान मुलगा अनिल या दोन्ही मुलांसोबत राहात होते. दरम्यान, गेल्या काही दिवसांपासून लहान मुलगा अनिल हा तुम्ही घरात चांगले जेवण बनवून देत नाही म्हणून वडिलांसोबत वाद घालत होता. कधीकधी यावरून वडिलांना मारहाण सुद्धा करत होता. दरम्यान, शनिवारी ( ता.०५ ) रोजी रात्रीच्या सुमारास अनिल याने पुन्हा याच कारणावरून झोपलेल्या वडिलांच्या छातीवर, पोटावर आणि गुप्तभागावर लाथा मारत बेदम मारहाण केली. या मारहाणीत गंभीर जखमी झाल्याने कडूबाळ यांचा जागीच मृत्यू झाला. दुसऱ्या दिवशी सकाळी या घटनेबाबत कळताच गावकऱ्यांनी वाळूज पोलिसांना फोनवरून याबाबत माहिती दिली.त्यानंतर वाळूज पोलिसांनी तात्काळ घटनास्थळी धाव घेत, आरोपीला ताब्यात घेत कडूबाळ यांचा मृतदेह रुग्णालयात शवविच्छेदनासाठी पाठवला. लग्नाचा तगादा वडिलांची हत्या करणारा अनिल चांगल्या जेवणाबरोबरच लग्नासाठी सुद्धा आपल्या वडिलांसोबत वाद घालायचा. माझं लवकर लग्न करून द्या यासाठी तो वडिलांना शिवीगाळ करत मारहाण करायचा. त्यामुळे मोठा भाऊ सुनील आणि वडील अनिलला प्रचंड घाबरत होते. मात्र एवढ्या शुल्लक कारणासाठी अनिल वडिलांचा जीव घेईल, असं कुणालाही वाटलं नव्हतं.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/pEzLqQM