पुण्यात सारस बागेसमोर महिला मागत होती भीक; चौकशी केल्यानंतर वेगळंच सत्य समोर आलं!

: बेकायदा सावकारीमुळे एका ज्येष्ठ महिलेवर भीक मागण्याची वेळ आली होती. पण, जागरूक नागरिक व खडक पोलिसांमुळे या ज्येष्ठ महिलेची बेकायदा सावकारी करणाऱ्याच्या कचाट्यातून सुटका झाली. या सावकाराने ४० हजार रूपये कर्जाच्या बदल्यात ज्येष्ठ महिलेकडून तब्बल ८ लाख रूपये उकळल्याचं समोर आलं आहे. सदर सावकाराला खडक पोलिसांनी अटक केली आहे. ( In Pune) खडक पोलीस ठाण्याच्या हद्दीत तक्रारदार ७० वर्षीय महिला राहते. त्यांना दोन मुली असून पतीचे बऱ्याच वर्षांपूर्वी निधन झालं आहे. त्या महापालिकेतून सफाई कामगार म्हणून निवृत्त झाल्या आहेत. या महिलेने पाच वर्षांपूर्वी नातीच्या उपचारासाठी आरोपी दिलीप विजय वाघमारे (वय ५२, रा. गंज पेठ) याच्याकडून ४० हजार रूपये कर्ज घेतले घेते. त्यानंतर ज्येष्ठ महिलेने बँकेतून कर्ज काढून ४० हजार रूपये दिले. त्याचबरोबर व्याजापोटी एक लाख रुपये दिले. तरीही ज्येष्ठ महिलेच्या असुशिक्षितपणाचा फायदा आरोपीने घेतला. महिलेच्या नावे असलेले बँकचे पासबुक, दोन एटीएम कार्ड आरोपीन स्वतः कडे ठेऊन घेतले. महिलेला दर महिना १६ हजार रूपये पेन्शन जमा होत होती. महिलेच्या खात्यात जमा होणाऱ्या पेन्शनपैकी आरोपी एक ते दोन हजार रुपये महिलेला महिन्याला देत होता. बाकीची रक्कम तो स्वतः काढून घेत होता. त्यामुळे महिलेचा वैद्यकीय व दैनंदिन खर्च भागत नव्हता. त्यामुळे या महिलेवर भीक मागण्याची वेळ आली होती. त्या दररोज सारस बागेसमोर भीक मागत होत्या. या ठिकाणी गणपतीच्या दर्शनासाठी आलेल्या एका व्यक्तीने त्यांच्याकडे सहज चौकशी केली. त्यावेळी त्यांनी हा सर्व प्रकार सांगितला. ती व्यक्ती थेट त्या महिलेला खडक पोलीस ठाण्यात घेऊन आली. खडक पोलीस ठाण्याचे वरिष्ठ निरीक्षक श्रीहरी भैरट यांनी हा प्रकार ऐकून घेतला. त्यानंतर त्यांनी आरोपी वाघमारे याच्यावर बेकायदा सावकारीचा गुन्हा दाखल करून त्याला तत्काळ अटक केली. त्याला न्यायालयाने पोलूस कोठडी सुनावली आहे. या आरोपीने आतापर्यंत ज्येष्ठ महिलेकडून ४० हजाराच्या बदल्यात ८ लाख रुपये घेतल्याचं समोर आलं आहे. ज्येष्ठ महिलेच्या अशिक्षितपणाचा फायदा आरोपीने घेतला आहे. त्याच्याकडे आणखी काही जणांचे पासबुक सापडले आहेत. आरोपी हा महापालिकेत झाडू खात्यात नोकरीला आहे. अडलेल्या नागरिकांना १० टक्के व्याजाने पैसे देऊन तो व्याजाची वसुली करत होता. त्याने आणखी कोणाकडून अशा पद्धतीने पैसे घेतले असल्यास खडक पोलिसांशी संपर्क करावा, असं आवाहन वरिष्ठ पोलीस निरीक्षक श्रीहरी भैरट यांनी केलं आहे.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/87JLwZN