हायकोर्टाच्या खंडपीठासाठी प्रस्तावच नाही: केंद्राचे स्पष्टीकरण; नुसत्या भेटीगाठीच?

: मुंबई उच्च न्यायालयाचे कोल्हापूर किंवा अन्य कोणत्या शहरात खंडपीठ स्थापन करण्याबाबत राज्य सरकारचा कोणताच प्रस्ताव नसल्याची माहिती केंद्रीय विधी व न्यायमंत्री किरेन रिजिजू यांनी दिली आहे. खासदार श्रीनिवास पाटील यांनी लोकसभेत विचारलेल्या प्रश्नाला उत्तर देताना मंत्री रिजिजू यांनी ही माहिती दिली. () कोल्हापुरात उच्च न्यायालयाचे खंडपीठ व्हावं म्हणून गेले अनेक वर्षे लढा सुरू आहे. त्यानंतर काहींनी पुण्यात हे खंडपीठ व्हावं म्हणून मागणी पुढे केली. कोल्हापुरात हे खंडपीठ व्हावं म्हणून सातारा, सांगली, सोलापूर आणि कोकणातील जिल्ह्यांनी पाठिंबा दिला आहे. यामुळे कोल्हापूर जिल्हा बार असोसिएशनच्या पुढाकाराने खंडपीठाचा जोरदार लढा सुरू आहे. राज्य सरकारच्या पातळीवर यासाठी अनेक बैठका झाल्या. पण, राज्याने याबाबत कोणताच प्रस्ताव केंद्राकडे पाठवला नसल्याची माहिती पुढे आली आहे. यामुळे जोपर्यंत राज्य सरकार मागणी करत नाही, तोपर्यंत राज्यात कुठेच खंडपीठ होणं अवघड आहे. खंडपीठासाठी रितसर प्रस्ताव जाणं महत्त्वाचं असूनही तसा आग्रह न करता वकिलांनी आंदोलन आणि भेटीगाठीवरच भर दिल्याने ही मागणी मान्य कशी होणार, असा सवाल उपस्थित केला जात आहे. मुंबई उच्च न्यायालयाचे अतिरिक्त खंडपीठ मुंबई, नागपूर आणि औरंगाबाद या व्यतिरिक्त अन्य ठिकाणी स्थापन करण्‍याबाबत प्रस्ताव किंवा विनंती सरकारला प्राप्त झाली आहे का, असा सवाल खासदार पाटील यांनी केला. याशिवाय महाराष्ट्राच्या दक्षिण किंवा पश्चिम भागात कोणतेही अतिरिक्त खंडपीठ स्थापन करण्याचा शासनाचा विचार आहे का, तसं असल्यास, त्याचा तपशील; आणि नसल्यास विस्तारासाठी अशा योजनेचा विचार न करण्याचे कारण काय? असाही प्रश्न खासदार पाटील यानी विचारला. त्यास विधी व न्याय मंत्रालयाने असा कोणताही प्रस्ताव आला नसल्याचे उत्तर दिले आहे. दरम्यान, मागील अधिवेशन काळात खासदार पाटील यांनी विधी व न्याय मंत्री किरेन रिजिजू यांची समक्ष भेट घेऊन मुंबई उच्च न्यायालयाचे खंडपीठ कोल्हापूरला व्हावे यासाठी कोल्हापूर, सातारा, सांगली, सोलापूर, सिंधुदुर्ग व रत्नागिरी या जिल्ह्याच्या कृती समतीने दिलेले निवेदन दिलं होतं. त्याचा पाठपुरावा करण्यासाठी त्यांनी हा प्रश्न विचारला होता. .

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/YfLK8wZ